上海老家 (已結業)

今日到大角咀晚餐，閒日的街道不算多人，唯獨這間在車房附近的餐廳門口不時有外賣車手取貨，所以決定一試。餐廳位置不太起眼，但內部嘅傢俬古色古香，十分有懷舊風味。店內的姐姐十分親切，介紹了我們必食小籠包和酸菜魚。我哋另外再加點醉雞，素鵝和香醋排骨。醉雞雪得夠凍，雞皮爽滑肉質鮮嫩，酒味香濃。素鵝調味恰當，但個人略嫌炸得太乾身，我比較喜歡吃到軟滑豆皮的質感。招牌小籠包十分貼心用上錫紙兜載着，每次都會篤穿小籠包皮的殘手表示好感動，終於可以連埋湯汁一齊食到小籠包嘅滋味。酸菜魚大大兜，魚肉嫩滑，酸菜湯頭惹味，一眨眼已經清咗一大半，難怪每枱都必點。最後上菜的香醋排骨又係大大碟，掛汁香甜，送飯一流。眼闊肚窄嘅我哋堅持要食埋高力豆沙，埋單人均三百幾性價比實在非常高，難怪外賣車手絡繹不絕。