金撈老鴨湯刺身火鍋專門店 (已結業)

天寒地凍最好去烚烚下，有朋友介紹佐敦有間專食鴨湯嘅，話好好食，地方闊落，發好啱吹水食飯。位置唔算好近地鐵站，比較偏，其他嘅好有驚喜。嗌咗個招牌湯底，金撈富貴老鴨湯，職員好好，會幫手處理個湯底，仲建議我哋一定要飲下個湯，真材實料完全冇味精。果然味道好濃郁，就好似燉湯咁，打邊爐個鴨肉嚟講都算好好食，一飲飲咗兩碗。先嗌咗小食，老友鬼鬼，即炸嘅油炸鬼，再加上蝦膠，面再加咗少少蟹籽，脆卜卜得來又彈牙，如果未齊人要等朋友，記得要嗌呢一個試吓。見個Menu咁得意，有個叫幸運扭計骰，於是乎即刻嗌一個，原來係豆腐加鴨血，設成一粒粒，之後仲好有心機咁砌到一格一格變成扭計骰。店員好細心會另外俾個網你好易爛同散嘅嘢就可以抌入去，豆腐好嫩滑而鴨血亦都口感唔錯。另外都推介呢度嘅手打丸，試咗手打蝦丸同四寶，全部都真材實料，而且好彈牙，爽口，呢個價錢嚟講算係好抵食。其他大路嘢就唔詳細講，全部都合格水準以上，值得一提嘅係呢個湯底好好飲，所以記得要嗌啲菜，今晚嗌咗萵筍冬瓜，同埋粟米，全部都非常吸味，完全食得出佢嘅清甜，不知不覺食晒全部菜。