心。泰 (已結業)

去朗豪坊行街順便搵食，之前上網睇過已打算o黎呢間。三文魚蘿蔔卷-薄薄一片的生蘿蔔包住三文魚，好清新幾適合夏天食，不過三文魚有D根。香芒柚子沙律-特別在於有幾片紫薑，所謂香芒都只係得幾粒，柚子份量亦唔多，最多係青木瓜絲。我認為醬汁唔夠多亦唔夠味，老公就剛好相反，話味道過酸。豬仔骨青咖哩-一共有5舊骨都算多，豬仔骨冇乜味勝在唔" 鞋" 口。D汁好浠，老公仲當湯飲，佢話好正，其實個咖哩汁又香又夠辣，只可惜我唔鐘意佢D椰汁味。多料卡拉布撈冬粉-全碟連D配料都冇乜味，除了D豬頸肉唔錯，不過切得太薄。D冬粉又話已撈了香辣汁，係完全冇味的，最後問個侍應姐姐拎D魚露同泰式酸辣醬點，但係D魚露太鹹，酸辣醬就好好味。仲有D冬粉又唔剪開，一大舊好難夾。最後o黎個香蒜白菜，雖然好簡單的一個炒菜，可能加了炒香的蒜蓉落去，好香好味，而且d白菜幾靚，唔會霉幾爽口。老公又叫了杯薄荷荔枝蜜，被d薄荷蓋晒D荔枝蜜味，我只飲到一陣勁薄荷味，如果鼻塞的話都通番晒。講下佢o地D服務唔錯，連老公都讚，侍應個個都好smart，唔會" 烚烚下" 。