華記小食店

營業中

休息中

N年都唔入青衣一次，仲要第一次去到咁入，算係比較偏僻。我唔係特別鍾意食車仔麵，好似間間都差唔多咁，聽講呢間華記喺疫情前仲要排長龍咁誇張。因為即叫即整，所以都要等十幾分鐘。地方比我想像中乾淨，果日唔算熱，吹風扇都已經好涼。我果碗車仔麵淨係叫韓國花菇、菜同蘿蔔，咁清淡應該冇乜特別。但冇諗到花菇一食落去係咁入味🤤蘿蔔係清甜。試咗一隻黑糖煙燻雞翼，個煙燻味好香。另外唔同嘅小食都係佢嘅賣點，佢仲有個小食排行榜，可以睇到邊啲小食係比較受歡迎。個桂花蜜燒墨魚丸個燒墨魚味好香濃，有少少脆，爽口彈牙，桂花蜜個量係足，不過我最鍾意係佢嘅寸勁豬頸肉。老闆好細心，有碟係寸勁豬頸肉，本身係辣，佢話見我哋冇食辣就幫我哋走辣，上碟前將豬頸肉吸哂油，食落去係厚實，一啲都唔韌唔乾，肉汁入口即融。每次上菜，老闆都會嚟介紹吓小菜嘅特色。意外嘅係，我哋食完之後，佢退返10蚊俾我，因為果日豬頸肉唔算大份。不過睇得出佢係好用心經營呢間小店，幾乎樣樣餸都係佢親自主理，見佢走嚟走去又去睇火又煮小菜，呢樣係食肆基本要有嘅態度同水準。