芯 (已結業)

夜晚買左7:15既戲飛睇戲，於是我同男朋友早啲食晚飯。我地叫左正宗大阪燒、M6-7和牛牛腹肉、刺身拼盤、帶子刈包。正宗大阪燒上碟啲木魚郁郁下，好過癮。Size比我想像中大，包住好多椰菜，仲有啲紅薑，成件事令人好似有去左日本既錯覺。M6-7和牛牛腹肉肉眼睇都覺得係靚牛，燒到五成熟，肉質幾腍，有牛味。刺身拼盤有四種刺身: 三文魚、油甘魚、帶子、赤蝦。全部都好鮮甜而且厚切，令人好滿足。帶子刈包(海膽&紅蝦)原來係帶子夾住海膽同紅蝦一齊食，好奢侈既感覺，食得出好新鮮既味道，啖啖肉既口感好正。