牛記茶室 (已搬遷) 新店位置

但凡食物或餐廳被阿蘇介紹過，總會吸引一班生客親身體驗，當然食過之後感受如何，絕對見人見智。我同男朋友一向都有去牛記食飯，老闆好人，食物好味，環境唔稱得上絕佳，卻已是預計之內。節目出街後昨晚再去，星期六夜晚八點左右，門口有人龍。等候期間所見所聞，生客佔多數，熟客都有，不過他們一見如此場面，都打包回家慢慢享受。廿多分鐘後坐低落單，聽到廚房傳來蘿白牛腩煲賣剩一客，除預訂外，不再接新單，真夠誇張。我們就叫了牛腩煲和肉碎海蝦浸勝瓜，白飯兩碗，食得津津有味。期間又聽到廚房傳來白飯售罊。剛煲好的白飯不消一會又被消滅，確是厲害。顧客多，水準依然，最為難得。若然為賺錢，老闆大可降低要求，食物質素雖然參差，在傳媒威力下仍能吸引慕名者光顧。不過牛記就是堅持要做好的食物，就憑這點，絕對值得一直捧場。