仁利餅家

營業中

休息中

踩單車喺大埔墟聯和墟食晏，食完晏之後今日嘅目標就係嚟呢度買中式唐餅。本身上年已經想試佢個柴火月餅，但係實在太懶最後都係冇買到。今次專程踩單車嚟，先試下佢啲餅食如何。可能食咗嘢，購買嘅意欲唔係好大，又驚快啲嘢係單車頭會撞碎晒，所以都係淨係買咗香蕉糕同埋皮蛋酥。店主婆婆好友善，除咗入盒之外仲加用個膠袋紮到實一實先比我掛喺單車上邊，返到去屋企一啲都冇散到，個香蕉糕都好軟熟食得出係新鮮整嘅。個皮蛋酥都好有層次，蓮蓉唔會太甜皮薄餡多真係唔錯。同埋下次要試埋佢個忌廉賓，同出邊真係買少見少。同埋問佢幾時有得夾訂月餅，佢話隨時訂都得，又唔使俾訂金到時候先至攞貨，呢間店真係好有人情味。今年真係唔可以太懶，要早啲嚟買月餅。