胡爐 (已結業)

之前一直都聽過醉胡爐呢間餐廳，佢地做開高級單點火鍋，但一直未有機會試。上網睇介紹原來佢地開多咗間叫胡爐，地點更方便，形式就改做半放題，價錢好親民，食物依然用高質食材，抵夾飽！$298半放題套餐，飲品另加$38任飲。鍋底六選一，另有4款指定海鮮拼盤，胡爐拼盤（澳洲和牛、牛舌，黑毛豬豚肉），手工丸餃拼盤，依家仲會送麵包蟹一隻！初頭先食咗贈送大大隻嘅麵包蟹，蟹膏好甜而且好多蟹肉。我地就揀咗胡爐雞煲小辣，味道同平常嘅四川麻辣味有啲唔同，佢地嘅湯汁較稠身，雞件可以盡吸湯汁精華，層次豐富，唔會一味死辣，好惹味！海鮮拼盤有帶子、蜆、蝦、鮑魚，洗得好乾淨，味道鮮甜！肉類拼盤嘅質素都唔錯，2人食嘅話份量相當足夠，牛肉肉味濃，有咬口得黎又唔會韌，牛舌彈牙好味，豚肉都唔錯。丸餃拼盤都有驚喜，黑松露墨魚丸超香又彈牙，鮮蝦雲吞帶點泰式辣嘅味道，xo醬帶子餃都好特別。半放題嘅意思係指定食物任點，款式唔算好多，但其實食完前面啲雞煲同拼盤已經飽咗8成，大推冬瓜、白蘿蔔及豬皮，食物吸晒所有湯汁超入味！