源品車仔麵茶餐廳

營業中

休息中

係維園游完水之後，時間已經係2:30，中午都未食，真係覺得好肚餓，🤤朋友話差唔多10年冇去過大坑，想睇下大坑有冇變到，離開維園游泳池後我地沿銅鑼灣道一路行入去，中途經過浣沙街，再慢慢行入啲內街，見到一間茶記個名叫做源品，係食車仔麵既。🤔一開頭入去既時候係冇咩人既，之後慢慢越黎越多人，一入去餐廳老細都好殷勤咁招待我地，落完單仲同我地講唔該哂，我去過咁多間餐廳冇一間係會咁有禮貌，所以呢間餐廳既職員既服務態度真係要一讚。服務態度好，食野都食得開心啲。環境方面，佢係一般車仔麵既格局，地下大致都乾淨既，無咩垃圾，不過間餐廳比較細，坐位比較迫，如果大返小小會坐得舒服啲。至於食物方面，友人叫佐車仔麵套餐 ($46)，先講啖湯先，飲第一啖覺得有少少辣味又有少少甜味，一碗麵有三餸，朋人叫佐豬紅，魷魚同埋蘿蔔。魷魚食落好新鮮，亦有濃濃既咖哩味。至於蘿蔔呢就好鮮甜，豬紅有好多舊，食完一定好夠飽。至於我呢，我就叫佐奶油多士（$18），上碟時佢係切開佐4塊，件多士整得好脆，配上濃濃既煉奶，食完真係好想整多一碟。我地兩個都叫佐凍檸茶，杯凍檸檬茶既味道係岩岩好既，唔會話太甜太酸。我覺得同出面既質素差唔多。