太和殿海鮮火鍋 (已結業)

雖然住喺屯門，但出去荃灣同出去元朗嘅分別唔大，所以好少專登去元朗。咁啱堂妹住喺元朗，所以隔唔時都會去搵吓佢。由於見親面都雞啄唔斷，所以一定要搵間食肆係可以畀我哋坐返咁上下時間。堂妹提議不如去打邊爐，貪佢烚下烚下好襟食，於是就去咗一間類似中式飯店嘅地方試試。 入到去環境都幾舒服，有卡位亦有大枱，細細哋一間飯店都間咗兩間獨立房，幾適合一班親戚朋友聚餐。 原來舖頭唔單止有得打邊爐，小菜選擇都好多，如果有啲朋友唔鍾意打邊爐，可以齋叫小菜都得，不過目測店內嘅客人基本清一式都係食火鍋。最過癮嘅係無諗過一間火鍋店竟然會有埋新鮮刺身食，選擇仲要唔少，真係中日合壁。 揀食前都要先揀湯底，因為我哋兩個都嗜辣，所以揀咗個沙爹鍋。沙爹湯底一上，用匙羹攪下，比較杰身，似係真材實料。呷返一啖，一個字「正!」，沙爹味夠晒濃，仲有花生醬味，唔會好似坊間溝淡晒嘅嘅沙爹鍋，係非一般嘅沙爹鍋，佢成功令我期待之後將配料掉落去烚嘅一刻。 既然一心諗著嚟打邊爐，緊係嗌返碟牛肉。牛肉選擇五花八門，安格斯肥牛係必有的選擇，另外都有平時較常見嘅頸脊，所以我哋就決定揀頸咀($298)試下。一上枱，我哋都俾佢嘅碟頭嚇親，份量一啲都唔欺場。