老闆火鍋冰室

營業中

休息中

近屯馬線朗屏站，住元朗或者黎元朗玩嘅朋友可以一試。餐廳係仿舊式冰室裝修，大部分都係卡位，坐得幾舒服。檯面好整潔，完全冇油笠笠嘅感覺。雖然係夏天嘅平日晚上，入黎坐左一陣已經滿座，似乎口碑唔錯，要等到10點左右先至打到卡。樓面姐姐都幾熱情，間中過來講下笑，又會主動加湯同換碟。鍋底同雞煲嘅選擇好多，大部分配料都可以選半份或一份，即使2個人撐檯腳都可以嗌好多唔同嘅食物。鍋底選左野紅茄極品牛尾鍋，成鍋都係鮮番茄同大大件牛尾，仲有紅蘿蔔、粟米、鮮菇、雞腳等配料，淨係呢d都可以食飽。極品安格斯牛頸脊， 牛肉份量好多，可鋪滿一碟，厚度適中，上碟已經解凍，唔會有牛騷味同雪味。配料點左黑椒牛筋丸、蟹子包心丸、魔芋絲同山根。黑椒牛筋丸，牛筋同牛肉分佈平均，保留左好多肉汁，非常有嚼頭。包心丸入面有滿滿的蟹子，外層彈牙。流口水臭豆腐好少火鍋店有埋臭豆腐，簡直眼前一亮。薄薄的豆腐配上香辣油、脆蒜、花生同蔥花，易入口又惹味。鹽香脆炸魷魚鬚魷魚外面酥脆內裡嫩滑，加上炸蒜蓉好香口。呢個鍋底有濃郁嘅番茄味，平時打邊爐絕對唔食麵嘅我，都加左個出前一丁，自製番茄濃湯公仔麵為呢餐劃上完美句號。