圓老爺雞煲小廚 (已結業)

雖然最近元朗就唔係好太平，不過都冇阻我揾食既決心，我地襯星期日黎到元朗既圓老爺雞煲小廚，就咁睇店面雖然唔大，但原來樓上仲有一層，都幾熱鬧呢。小菜既menu選擇都幾多，不過佢地主打既係雞煲，當然要一試啦。我地點左個麻辣重慶雞煲（一隻），上枱煲一陣就已經可以食，我覺得份量剛好夠4個人食呢。一開煲蓋啲香氣就溢出黎，聞到我地流哂口水呢。雞肉都幾嫩滑多肉，夠哂入味，雖然叫麻辣不過都唔算太辣，唔太食得辣既朋友都可以食到呢。除左佢地最出名既雞煲之外，仲點左個得奬既菜式：得獎金湯南瓜盅。原隻南瓜上，非常吸引呢！入面係海鮮南瓜湯，有魚有蝦，啲海鮮都冇煮到太熟，仲幾嫩口，唔錯！飲完個湯仲可以刮啲南瓜肉黎食，一餸兩味，滿足。食完雞煲同金湯南瓜盅之後就點左啲配菜食火鍋，menu要另外同店員拎的，我想食既菜佢都有呢。朋友最愛既豬潤，佢話煮完都幾爽口。大家都一致好評既手打墨魚滑。火鍋必備既肥牛，夠哂大份。