石鍋堂

營業中

休息中

今日寒流襲港，天寒地凍我和同事重要去旺角見客，辦完事經過石鍋堂，見到有不少客人在等位，咁凍天氣食返個熱辣辣石鍋烏冬，真係想起都暖笠笠，我哋即刻加入排隊行列等入座。店內地方不大，環境整潔乾淨。主打的日式石鍋烏冬之外還有石頭鍋飯及其他日式料理。吉列豬扒石燒手打烏冬，石燒手打烏冬可配五款不同自家泡製濃湯底，揀咗黑蒜油豚骨湯，湯係用石鍋上，所以夠晒熱辣辣，上枱時仲滾起泡泡，湯底係用咗日本青森縣黑蒜，配以自家製豚骨湯底熬製，飲落帶有黑蒜獨特嘅酸甜味道，濃郁香醇。而另上嘅吉列豬扒係厚切，外脆肉嫩好香口。手打烏冬口感彈牙。石鍋堂海鮮石燒手打烏冬，湯底係魚介豚骨濃湯，用咗柴魚乾、小魚乾、鰹魚乾、魚乾粉、乾貝粉、昆布等熬煮10多小時而成，味道濃郁鮮甜。海鮮亦好豐富，有鮮蝦、帆立貝、蟹柳、蠔和蜆，味道鮮甜。唐揚炸雞，炸雞炸得不油膩，一口咬下外酥內軟保留肉汁原味。