蓉芳 (已結業)

行行下千色店肚餓，見到呢間餐廳燈光好光猛，見餐牌選擇都多，好多都想試，於是入去慢慢揀。最後食豬扒雞蛋意粉，擺碟乾淨令人食慾大增，而且份量都好足。第一啖梗係切件豬扒食先，煎到有焦糖色，好香。唔厚唔薄但有肉感。最最最意想不到、越食越起勁係個牛肝菌忌廉汁，以為普通洋蔥汁，第1次食呢個汁好香好濃，好後悔無問到可唔可以加多啲汁，可以當係撈麵食。至於意粉就軟硬適中，蔬菜食落有汁水，唔會乾爭爭，整體野食不錯。此外，留意到每枱都有一支水同水杯，方便客人飲水、洗餐具，但有客自行倒水入自己水樽，極度不衞生，同埋上手可能無用過支水同水杯，見職員無收依舊放原位俾下一枱客人用。最後點餐過程體驗麻麻，無人理，揮咗幾次手，穿西裝嘅男職員又無禮貌，黑口黑面好似趕客咁。