自家製韓國刀削麵 (駱克道)

營業中

休息中

朋友仔大大力推介呢間小店，原來係李家嘅副線品牌，主打自家製韓國刀削麵，元朗尖沙嘴銅鑼灣都有分店，三間嘅食物款式都有少少唔同，前者有餃子同煎餅，後者就有埋鍋物供應，食物價錢合理，試試無妨。砂鍋牛腱幾啱同朋友一齊開心Share，上面鋪滿牛腱，肉質厚實，帶有咬口，牛味香濃，部位偏瘦，感覺完全無負擔。下面有金針菇同香蔥，湯底鮮甜，飲落暖胃，店員好好人，見飲晒加咗一次湯，枱上面有幾款調味料，重口味人士可以再額外加胡椒粉或鹽增添味道。炸醬麵係最近新推出嘅款色，醬汁唔會死甜，帶點鹹香氣，自家製刀削麵口感彈牙，QQ哋，連平時唔鍾意食麵嘅都覺得好正，忍唔住一啖接一啖呀，會話係款簡單又美味嘅主食。另外若喜歡飲燒酒嘅呢度都可以叫，邊飲邊食更爽快。