Cafe Wellcome x BBQ Place (已結業)

無意之間搵到呢間餐廳食晏，食飯時間喺九展度度都要等位，主要嘅餐廳係地下同一樓都係好多人。見到海報號稱全港最大空中花園餐係4樓就上去睇吓。佢係最入嗰度，所以唔係好多人知，餐牌唔貴基本都唔過百，有沙律、餐湯、餐包，冷熱飲品，仲有甜品，其實都幾抵。最貴嗰個肉眼扒都係$128。燒春雞唔係度度都會有，就叫咗呢個試一次，半隻嘅份量都唔細，好重香料味，隻雞唔會好肥，而且做到皮脆肉嫩。甜品可以揀是日甜品或者Movenpick 雪糕。我就揀咗是日甜品黑森林蛋糕，估唔到係好好食。佢哋原來五六日會做戶外燒烤，再望一望原來出邊有個大空地，仲可以帶埋啲寵物一齊食。市區想搵個咁嘅位都唔係咁容易呢度的確係幾好。