Namo Avant Thai Restaurant (已結業)

Item: Namo Avant Thai Restaurant
Rating: 4
Author: 幸福.肥.

4.5

401 食評

味道

環境

服務

衛生

抵食

22894

尖沙咀

$201-400

泰國菜酒酒吧

318

幸福.肥.

等級1

幸福。肥。兩小口👫加閨蜜公婆🙆🏻🙆🏻‍♂️

全日keep著打風落雨🌪🌧，收左市💹，李生終於批准八號風球生效，打工仔可以提早收工！

當個個趕頭趕命返屋企，地鐵大擠塞之制🚇，我地又難得可以5點幾收工，梗係約埋啲friends飲杯野食個飯先啦😌

因為我係尖東返工，男朋友仔為左就我由鰂魚涌搭地鐵過黎搵我先，打埋俾係尖沙咀返工既閨蜜冒着風雨一齊出動搵地方飲野食野✌🏻

起初諗著去成日食既Nara Thai，點知因打風餐廳無開到，我地唯有轉戰另一泰國餐廳Namo😈好彩皇天不負心人，八號風球都有開，入面仲有一枱客添呀，唔係得我地八號風球唔返屋企咖！

黎到坐低即刻叫左一round Asahi🍻，慢慢嘆等埋閨密既另一半係港島收工過黎會合我地🤗

Namo同尖東大部分餐廳一樣，8點前都係happy hour時段，大部分飲品都係買一送一咖，啤酒🍺、紅白酒🍷、cocktail🍹都有呢個優惠！

一路飲啤酒既同時，waiter為我地送上呢度獨有既Amuse-bouche西瓜蝦串🍉🦐一個好特別既配搭，站時只係係呢間餐廳見過👍🏻雖然呢款小食咁耐以黎都無變過，每次食落仍然覺得好清新好fresh，因為除左有西瓜同蝦之外，佢中間仲夾著一塊薄荷葉，夏天食特別正，令岩岩橫風橫雨狼狽既感覺一掃而空😚

有酒當然都要有送酒既小食啦，我地先點左2樣小食，沙爹雞串🐥同鐵板豬頸肉🐷

沙爹雞串 6串 HK$128（⭐️⭐️⭐️）最高5️⃣⭐️
🤷🏻‍♀️：原諒我去到邊度都要叫沙爹雞串，因為我太愛呢個小食，實在太好味😛

雞串熱辣辣，味道唔錯，食落唔會有雪味🙂好多人可能未必會咁注重個沙爹汁，但我就好留意，因為好味既話直頭可以用黎撈飯食😗呢度既沙爹汁好香，好有花生味🥜

鐵板豬頸肉 HK$138（⭐️⭐️⭐️⭐️）
🙆🏻：輪到我閨蜜既至愛，成日同佢食飯都會點豬頸肉😆

豬頸肉賣相好靚，幾大份，4個人食都好足夠，加上餐廳用鐵板燒啲豬頸肉，食落好香口好野味👍🏻配埋佢辣辣地既豉油真係好正😋

入左一杯，食左啲小食，閨密既另一半終於到喇，我地都開始點主食！因為有兩名男士，所以我地叫多左3樣野😉

燒牛肉沙律 HK$168（⭐️⭐️⭐️半）
🤷🏻‍♀️：無錯又係我喇，又係我去到邊度都好鐘意食既燒牛肉沙律，所以你地將會一直見我去唔同地方都要叫呢樣野😝

呢個燒牛肉沙律係辣辣地，唔食得辣既朋友仔要諗清楚先好叫呀，唔係講笑，真係辣🌶，所以我閨蜜handle唔到，食左兩啖就無放棄左，而我當然繼續食得津津有味啦😅牛肉好嫩，沙律菜好fresh好新鮮，個沙律sauce辣辣地好開胃！不過印象中上次係再好味啲🙁

英國蟹皇炒飯 HK$178（⭐️⭐️⭐️）
🤷🏽‍♂️：心大心細，本身想叫Pad Thai，不過醒起上次食過無咩驚喜，所以試下呢個蟹皇炒飯🤘🏻

不負眾望，呢個蟹皇炒飯賣相好靚，炒飯上面放左2隻蟹鉗，炒飯炒得幾乾身，粒粒分明，入面食到有新鮮蟹肉，食落去幾香幾好味😄

殼飼西冷牛扒 HK$318（⭐️⭐️⭐️⭐️）
🙆🏻：睇返openrice啲食評、相片，再搵返呢個餸出黎，因為閨密話食過呢個牛扒覺得唔錯☝🏻

就咁睇個menu絕對唔會知道呢個西冷牛扒係會配紅咖哩汁，真係要靠openrice啲食評家多多share下先會知道🤓

呢個牛扒望落去幾靚仔，生熟適中，唔會overcook🤤而且肥瘦適中亦無筋，肉質唔錯，加上牛扒燒過再放上咖哩汁，所以好香👍🏻當你以爲牛扒係呢個dish既主角，隔壁果2名男士不斷重覆「個汁真係世界級」，誇張到一個點⋯明明已經飽飽地，都忍唔著要叫個白飯share，就係為左唔好晒左啲咖哩汁，最後一滴不留清晒😂

服務不過不失啦，唔知係咪因爲成晚加埋都係得3-4枱，所以可以照顧到每枱客👌🏻

用左八折卡，四個人八號風球飲飽食醉，連埋加一，一共HK$1370，抵食😎