一寿司 (已結業)

旺角呢間店我由佢搬之前已經食食到而家，上個月中推出左呢個六點開始嘅黑夜壽司，梗係要帶埋屋企人黎食啦。嗰一日大概七點三到嚟到，條人龍排到去穿過左後樓梯係另外一邊出返嚟，我哋大概排咗一個鐘左右，可能因為係星期五都比較多人。但係我印象中黑夜壽司不嬲都排咁上下時間。入到去即刻落單，但係可能因為太多人，都等左成半個鐘頭先有第一碟黎。我哋今次覺得最好食嘅就係火炙三文魚，其實佢有三款，一款就係普通嘅，另外一款加左芝士，最後一款係汁燒。我就最鍾意係汁燒，個汁甜甜地，配埋油香既三文魚真係好好食，但係媽咪就最鍾意係普通火炙三文魚，話咁先食到三文魚既油香，唔會比個汁蓋過。 但係啲三文魚切得好薄，燒完都所剩無幾另外點左帆立貝壽司，我覺得比較乾身，又唔夠凍，好似唔係好新鮮，所以就冇再encore。至於甜蝦，呢度嘅又大隻又甜又夠凍，我地叫完壽司再叫左刺身食另外我屋企人好鍾意點北寄貝，我自己就麻麻哋，覺得佢好乾身，好似𡁻舊膠咁。今次食咗每人大概百零蚊，質素唔係話好高不過性價比就幾好，如果係正價嗰陣時我諗我就唔會黎食啦。