我的意大利廚房 (已結業)

入到呢間意大利餐廳， 見到環境四周好有意大利風情，感覺好浪漫又舒服， 面積好大，分開上下兩層，一早book咗枱，門口侍應生引領我哋沿著螺旋樓梯上樓上座位。餐廳佈置好grand，好classic, 可能時間尚早，唔係太多人，好寧靜，可以舒舒服服enjoy 下。首先我哋叫咗個意式小食拼盤， 個意式拼盤跟埋一個薄餅一齊食嘅， 望下個拼盤好豐富喎，有蝦啦、魷魚仔、火腿，有唔同種類嘅菇，仲有橄欖同好酸味味又甜甜地嘅梅子，依個前菜非常醒胃又好味。肉醬意粉都好好味 ， 啲蕃茄醬汁好有意大利style風格， 豐富番茄酸甜味 ，意粉好彈牙，al dente 總之一個字燒烤豬扒有成兩大塊咁多，啲配菜都好多種類， 豬扒入口肉質好淋，好juicy，冇好重嘅豬味。食得咁開心當然梗係有壓軸好戲甜品出場啦，叫咗個朱古力tiramisu 同埋焦糖燉蛋。味道都唔錯，好嫩滑，但個人覺得甜左啲，不過意大利甜品係甜啲嘅。享受左一個食物有水準，環境又舒適浪漫嘅一晚，心情正到不得了呀。