飯飯店 (已結業)

當真冇改錯名中菜好少會食到伏野，不過好多時候都唔會食到特別出色既中菜店。今次尼間，司令都食左六七道餸，都有一大半做得好好食架。 辣酒煮花螺 ($168)尼道餸既重點唔係花螺，而係佢既辣汁，辣得好有層次，而且辣度都唔輕，司令撈汁都食左大半碗飯😌，勁想拎走佢煲辣汁！ 秘製脆皮炸豬手 ($168)食肉成癮既司令，當然唔可以錯過叫炸豬手既機會啦！豬手炸到脆卜卜，但司令略嫌有啲肉為左炸得脆口而變得乾，不過再配埋個醬汁沾嚟食就冇咁乾。醬汁係黑椒蜂蜜味🐝，食落感覺冇咁熱氣，甜甜地幾特別！ 蒜蓉粉絲蒸娃娃菜（$78）上碟嘅時候，司令已經非常震驚，因為真係非常多蒜蓉😂，粉絲同娃娃菜亦都吸哂蒜蓉嘅味道，不過司令覺得味道唔係好夠鹹，冇左一個靈魂嘅味道去提升佢嘅鮮味，或者加少許醬油會比較好。 花雕醉乳鴿 （$118）聞落已好香花雕酒味，食落乳鴿亦都好入味好香，食得出浸左一段時間，但肉質仲好嫩滑，而且肉地豐富，咬落啖啖都係肉。司令覺得除左燒乳鴿，依一味餸絕對係另一個好選擇。