鐵牛台灣牛肉麵 (希爾頓大廈)

營業中

休息中

延續今日食到飽既氣勢，睇完科學館個木乃伊展，搵左間台式牛肉麵黎食。上次已經想試，但奈何人太多等唔到。今次早左黎 (6點幾)，入座話咁易。呢度採用自助形式，侍應安排座位後，自己出去點菜俾錢然後返位等食。我地就叫左招牌紅燒牛肉麵、麻辣大塊牛肉麵、檸檬冬瓜茶同桂花烏龍冷泡茶。先講招牌紅燒牛肉麵，湯底香濃，帶少少八角香味，牛肉半腩半根，肉味濃而肉質鬆軟，麵底亦都爽口彈牙，完全係一碗合格有餘既台式牛肉麵。同樣地，麻辣大塊牛肉麵一樣有半腩半根牛肉同爽口麵底，湯底既麻辣味啱啱好，麻完又唔會太辣，辣完又唔會搶住要飲野，值得一讚。飲品方面，大熱天時飲一啖檸檬冬瓜茶，完全起左消暑解膩作用；桂花烏龍冷泡茶竟然係用樽上，淡淡既桂花香加烏龍茶，唔錯，個樽入面仲有茶包，留起個樽，拎返屋企又可以冷泡多一次 (希望仲有味)。唔駛等位而又想食牛肉麵的話，的確係一個唔錯既選擇，但如果要等位，我都係留返喺台灣排永康街牛肉麵好喇。