天河食坊 (已結業)

車仔麵一向係平民食物，但做得好一啲都唔易，我相信大家都食過好難食嘅車仔麵。呢間車仔麵做咗好多年，好多街坊都鍾意幫襯，除咗價錢平，當然質素都唔錯，性價比高。我今日帶咗三餸麵， 分別係紅腸、豬紅、同埋魚蛋。佢個麻辣湯味道唔錯，唔會好辣但係帶麻嘅感覺，豬紅係我最鍾意食嘅配菜，唔會一夾就散，仲有彈性，唔係間間車仔麵都做得到。小食方面，佢有好多選擇，牛雜啦，咖喱三寶等等，我今次就叫咗炸大腸同炸燒賣，佢炸大腸上碟之後會有蜜糖淋上面，炸大腸賣$16串，但件數都幾多，外皮香脆大腸彈牙。炸燒賣我不嬲都好鍾意食，不過我覺得炸得硬咗少少，不過不失。