十大碗粥麵專家

營業中

休息中

呢間10大碗真係好出名，慕名而來！趁今日經過太子，特登過嚟試吓！由於早過12點到達，人數並不多，我一個人好容易就入到去！由於係中午時間，有午市套餐，睇落去真係幾抵食！50幾蚊，包個撈麵，加埋雲吞！仲有嘢飲㖭！性價比好高！本來應該食碗雲吞麵，但見個餐咁抵食，忍唔住食咗呢個撈麵套餐，揀咗牛腩撈拼三粒雲吞！最後當然要食埋呢度好好食嘅炸兩啦！首先講吓牛腩撈麵，個柱侯牛腩汁係幾好食，不過啲牛腩嘅部位有啲麻麻哋，都比較柴！如果啲牛腩部位可以好啲就更加好啦！另外啲撈麵走鹼水做得唔錯，而且啲撈麵食得出就蛋味！呢個係出色嘅！跟住講返啲雲吞，食得出啲蝦好爽口，都係唔錯！另外個大地魚湯，有好香嘅鹹鮮味，我真係成碗飲晒！餐叫咗可樂，而且仲係樽裝添，真係幾正！跟住講返個炸兩，真係值得一提，個炸兩裏面嘅油炸鬼係即炸嘅，絕對唔係用啲擺咗好耐嘅油炸鬼！配埋個腸粉皮，個粉漿唔會好厚身，加埋一齊，又脆又腍！真係好正！下次大家嚟記得試吓！漏咗，唔記得講樣嘢，佢啲辣椒油都好正，唔係好辣嗰種，但有好多炸蒜喺入邊，而且肯定係新鮮做，真係好鬼正！