炊豕店 (加路連山道) (已結業)

星期六同男朋友到炊豕店食晚飯。店舖位於往大球場方向，唔好睇佢唔係位於當旺位置就無乜人，我地差唔多7:30去到坐左一陣就滿座，十分旺場。食完成餐飯就明白點解甘多人黎食。食物價錢唔貴，唔需要加一服務費，係銅鑼灣黎講，係平民選擇。食物質素亦絕對對得住個價錢，而且份量十足，一定可以食得飽，性價比高。餐牌選擇唔多，主要以豬為主。連裝飾都寫住「我們都是食豬大的」，好搞笑。我地叫左秘製豬扒配胡椒豬肚湯米線、沖繩豬軟骨飯、滷水雞腎、雀巢檸檬茶。秘製豬扒配胡椒豬肚湯米線豬扒果然係招牌，炸得好香脆，唔會只有炸皮但無肉，豬扒都算厚身，而且好大塊，擺好耐都仲好夠熱，勁。米線份量好多，仲有芽菜。沖繩豬軟骨飯好大碗，豬軟骨雖然唔係腍到無牙都咬到，但甘樣可以享受下咬軟骨既過程，幾好。滷水雞腎我食到有啲藥材味，雞腎口感軟腍，仲有啲酸芽菜。雀巢檸檬茶。