生記海鮮酒家

營業中

休息中

由於好耐都無去過荃灣悅來坊，所以今日我們就去咗行吓，行到一陣，我們就睇吓去邊間店食嘢，最後我們就揀咗呢間「生記海鮮酒家」食下午茶！我們叫咗三式腸粉皇「牛肉腸、蝦腸、叉燒腸」，平日食開嘅腸粉通常祇會有一款餡料，如果想食多幾款唔同餡料嘅話，就要叫多幾碟，但呢度就可以一次過滿足到我們想食多幾款唔同餡料嘅要求，軟滑嘅腸粉，分別包著鮮嫩嘅牛肉、爽甜彈牙嘅蝦肉同香甜嘅叉燒，真係好正呀！生記蝦餃皇嘅餃皮好煙韌薄身，蝦肉亦好爽甜彈牙，而且都幾大隻！田園菜苗餃嘅餃皮比較軟腍，入面嘅菜苗好清甜爽脆！懷舊鳳眼餃嘅餃皮相當晶瑩薄身，喺爽甜嘅蝦肉上面舖咗爽口嘅蟹籽，除咗令到口感更加豐富之外，賣相亦都比較吸引！鮑汁叉燒包嘅包質好香滑軟熟，鮑汁嘅味道唔會過鹹，而且都幾惹味！懷舊臘腸卷外層嘅質感比較煙煙韌韌，臘腸嘅味道相當甘香，而且油香滲透晒入包入面，真係好正呀！