康竜九州拉麵 (已結業)

之前睇過大家對呢間麵店o既食評,有讚亦有彈,好有興趣一試,結果尋晚就同左女朋友黎呢間麵店試一試味道如何,我女朋友就要左一個吉列猪扒拉麵,而我自己就掙扎於燒汁煮豚肉與猪軟骨之間,結果招牌菜戰勝了,我要左燒汁煮豚肉粗麵,點了菜,d麵好就快送到,先呷一啖湯底,發現d猪骨湯o既味同出面食開果d拉麵店o既味道有d唔同,我同我女朋友都覺得,d湯o既味道有d似o係屋企煲果d青紅蘿蔔煲排骨湯o既味咁,不過我地都覺得d湯好好味,飲得出好有猪肉同雞o既鮮味,冇出面食開果d咁味精feel,唔錯!再試一啖麵,d麵都好彈牙好爽口,d吉列猪扒亦都抵讚,d猪扒厚切但食落唔韌,外層脆漿亦唔會太厚.個燒汁煮豚肉都好入味,不過由於本人有肥膏恐怖症,故此,只試左一啖之後就冇再食.服務都唔錯.美中不足o既我諗係d麵o既份量比較少.整體上確實唔錯值得一試!