古今二 (荃灣千色匯I)

營業中

休息中

好幾年前，已經喺朋友推介之下試咗觀塘分店嘅古今二餐廳。當時嘅餐廳細細間，仲要喺工廠區，但係好有特色，食物質素都好好。當時冇咩地方專食創意卷物壽司，所以都覺得好有驚喜，而且價錢合理，性價比高，大大碟，一路都記掛住。差不多5-6年無食，然後在荃灣千色匯商場入面知道有開新分店，對我嚟講比較就腳。我同男朋友平日大概8點幾入到去，都差不多滿座。首先嚟咗一個小食先就係雞泡魚干，估唔到簡簡單單嘅雞泡魚乾，燒熱咗之後點蛋黃醬係咁好食。我哋點左呢個牛肉壽喜燒鍋，好大個鍋啊！而且仲有個熱爐，一路食都係熱辣辣。入邊材料好豐富，好多菜，金菇，豆腐，仲有大大片牛肉，仲有粗粉絲底添。我地點咗兩款創意卷物，因為我哋唔食生野，我哋就點左兩個都熟嘅。兩款卷物賣相都好好，材料十足，壽司上面仲鋪咗滿滿嘅蟹柳絲，真係好好食。醬汁加埋都好襯，加埋有淡淡地嘅芒果味，好開胃。我好記得以前喺其他分店食過龍捲風沙律，都係呢一個價錢，而且份量都係好大，份量好多，材料好足。入邊有蟹柳絲同中華沙律，同有啲脆片碎碎，食落口好多口感，而且蔬菜都好多好新鮮。