譽滿點心專門店 (已搬遷) 新店位置

新一年嘅時候同左媽媽去九龍城買嘢, 諗住食午餐時, 見到呢間點心專心店都幾多人等位, 所以媽媽就話決定等位試試!! 佢未試過食點心店的~得意點心係芥末蝦餃, 有粒細細粒嘅芥末餃仔, 頂得順芥末味嘅朋友仔可以一口食哂整隻蝦餃! 青芥末嘅攻鼻感唔算太勁, 蝦餃味道唔錯, 蝦肉爽彈!我最愛嘅肥仔點心有豉汁鳳爪, 有少少失望呢。鳳爪皮唔淋, 比較爽, 豉汁都唔錯嘅, 如果鳳爪淋啲會更喜歡~流沙奶皇包不負眾望, 好流沙呀。包鬆軟, 奶皇餡都唔少, 如果少啲甜加啲蛋黃粒會更好呀!!蝦春卷內蝦肉都飽滿, 外皮香脆, 都唔錯架!!媽媽最愛嘅鳳爪排骨飯, 原煲上, 份量都唔少, 排骨多而且有肉, 唔會肥膏多過肉。米飯煮得好, 粒粒分明, 軟硬適中, 媽媽好鍾意。甜品時間要食補血嘅椰棗糕。紅棗糕加椰汁糕, 賣相唔錯, 口感煙韌, 都幾好味!! 媽媽對呢次新體驗都覺得唔錯, 話要再試另一間。