淳吟居酒屋 (已結業)

涼風送爽嘅夜晚，行完西九文化區拍拖，再嚟到渡船行呢頭搵嘢食，見呢間居酒屋感覺幾好，就揀咗佢。先食一個軟棉蝦夷鹿肉漢堡扒兩食(紫蘇)，味道我覺得似淡少少嘅漢堡牛扒，配上有蘿蔔蓉嘅酸汁，十分惹味。再嚟一個柚子胡椒雞腿肉串燒，外皮香脆，內層肉質就嫩滑，有少少柚子甜香，相當唔錯。然後食土手味噌煮日本黑毛和牛牛雜，啲牛雜就冇香港嗰種有埋牛肚同牛栢葉，主要係牛腩同牛筋，炆得好冧好入味；但我反而最愛嘅係蘿蔔，啲汁入哂冧冧啲蘿蔔係好吸引架！！然後有海鮮大阪燒，細細個但都好足料，醬汁木魚唔會太多，恰到好處。清清地嚟個北海道帶子配紀州南高梅子冷素麵 ，冷麵好似有啲淡淡地嘅花香味，配上個湯汁，食完覺得好舒暢。甜品有個蕨餅，係餐廳送架。黃色嗰嚿用左黃豆粉，爽口啲冇咁甜，綠色嗰嚿係綠茶味，煙韌啲甜啲，建議先食黃再食綠，另外有啲紅豆蓉伴碟，有個甜甜嘅結尾。