The Joomak (已結業)

呢間韓式餐廳我間中便會幫襯，雖然侍應服務真心差，不過佢嘅炸雞飯又真係好食，午餐我通常都係食佢嘅炸雞飯，另外可以一試嘅就係佢嘅牛肋骨，其他嘅嘢我建議大家都係唔好試。呢間餐廳特別嘅地方係佢推廣素食，但係佢啲素食真係難食到爆，如果你唔信，建議你叫個素炸雞，然後叫返個正式炸雞，比較之下你就會知道分別真係大成咁。另外最過癮嘅地方就係佢個辛辣麵都竟然做得唔好食，真係非常難得架！仲有一樣野要睇下大家，就係佢啲侍應嘅服務真係差到無倫，唔夠人手係一件事，啲侍應愛理不理係第二件事，有時仲會黑面添。好彩佢個炸雞飯同埋牛肋骨真係好好食，如果唔係我諗真係好難比多一次機會佢。