泰COOL (英皇道)

營業中

休息中

自從佢8月中開舖，我食咗一次下午茶餐兩次午餐，今日試埋晚市散叫，簡單總結都係大件味正常抵食。大串燒拼盤($118)：豬頸肉正常唔靭，個汁好味。豬雞串燒唔鞋，普通啦，牛串燒有少少過熟，但個汁似乎唔夠香。馬拉盞通菜($68)：好抵！好大碟！質素味道都正常。黃咖哩牛腩($88)加蒜蓉包($30)：蒜蓉包無蒜粒，蒜味唔重，但個包非常鬆脆，點咖哩好正。黃咖哩牛腩，牛腩正常，黃咖喱就看似好稀，但點住個蒜蓉包又幾好味喎。今餐係食唔哂要打包。下午茶餐基本上都$48，除咗豬手飯同海南雞飯$58。我試咗海南雞飯($58)：飯唔太油，不過凍咗有啲硬，雞肉正常，不過無我最喜歡嘅甜豉油汁。午餐都$58。試過咕嚕魚，因為太少肉，仲要係魚，我唔夠飽，但味道正常。另一次試咗香葉肉碎煎蛋，肉碎比較濕，我覺得做生菜包會比較好。外子就試過牛柳粒紅飯，佢話個紅飯嘅酸味同甜味都可以重啲，牛柳粒就有微過熟。跟餐小食試過魚餅同春卷，魚餅香，春卷脆。