三少爺 (已結業)

好友特別喜歡食粉麵等有湯主食，是日經過韓國街去買辣椒粉整泡菜，見到三少爺招牌有啲印象。兩個人行行吓都有啲肚餓，既然有好友喜歡嘅喇沙，姑且一試。友人第一眼睇餐牌就已經決定叫二少爺海鮮喇沙。我就左思右想，本來比較喜歡食凍檬，但諗起自從離開灣仔工作後，好多年未食過令自己滿意嘅蝦湯麵，三少爺自己喺餐牌寫話每日用蝦殼蝦頭加大量香料淆製六小時淆出蝦湯精華，既然蝦湯麵係餐廳主打，當然要一試真偽。先上友人的海鮮喇沙，喇沙湯底有好濃郁咖喱香味，顏色亦偏向黃綠色，比平日食開的新加坡喇沙深色及少椰奶味。來到三少爺蝦湯麵，顏色深紅對板，有好香蝦湯味，飲落味道似龍蝦湯，証明真係用蝦殼蝦頭淆製。配菜用通菜、豆卜、雞蛋、魚片、豬腩肉同蝦亦見地道。大少爺雙炸係蝦餅同芝士蝦春卷雙拼，蝦餅爽口彈牙，芝士蝦春卷則皮薄香脆，包裹著蝦膠芝士及粟米。田園沙律用上西式沙律菜，加蕃茄青瓜粟米及日式芝麻汁，清清爽爽增加饍食纖維。三少爺沒有清水提供，不過跟麵飯有$10飲品送，可以加錢轉其他。