安東尼小廚 (已結業)

想食西餐，好耐無去過西貢，上OPENRICE睇吓食評先。嘩，安東尼差唔多全部都係好評，就去試吓。星期日，緊係打電話去BOOK咗位先啦，有個女仔接聽電話，服務態度都好好，仲問我使唔使留定D海鮮先，我話我第一次嚟，想睇咗個餐牌先決定囉。去到環境一般啦，好有茶餐廳FEEL，一層得幾張檯，不過好似有上層，我地就無上過去喇。我地一行四人，叫咗兩客磨菇湯，有四塊蒜蓉包送，磨菇湯味道好濃，好好味，蒜蓉包夠熱夠脆。凱撒沙律，呢個普通啫。薯蓉焗田螺，一碟有六隻田螺，味道OK。椒汁炒蟶子，雖然唔係好大碟，但炒得幾好味。芝士龍蝦意粉，勁正，我地要咗四人份量，有好多意粉，食到好飽。臨尾個朋友仲要一個芝士蛋糕，佢話好好食喎。免茶芥及加一，總數五百二十五元，我地都覺得好抵食。一定會再有下次。