春城銅鍋米線

營業中

休息中

今日出開嚟睇戲，喺附近見到一間食米線嘅用具幾特別，所以過嚟試吓。我叫咗個自選銅鍋米線，我揀咗佢哋招牌嘅螺旋藻腩肉另外再加新鮮蠔仔。佢呢個蠔仔真係落足本，叫咗酸辣湯小辣，但係成個湯都好有蠔仔嘅鮮甜味，因為呢度真係煮米線俾你食，所以個湯真係不得。另外佢啲米線都啱啱好，唔會太硬都唔會太腍，好爽口。呢間米線真係絕對超值得encore。不過就略嫌佢啲腩肉唔夠腍，如果可以再淋啲再入味啲，咁就完美啦。因為我同朋友都唔係好食碳水，所以我哋選擇咗嗌一個米線兩份分，然後再嗌其他小食。我哋試咗佢個香煎墨魚餅。呢個墨魚餅應該係自家製因為同出邊食到嘅味道唔同，彈牙得來唔會太過死實，係有清甜嘅墨魚味，又係好出色。然後豆卜釀蝦膠，佢個豆卜真係炸到超級鬆脆。之後你會見到滿滿嘅蝦餃，真係料到童叟無欺，朋友話好好食，佢形容為好似臭豆腐出邊嗰層皮，但係再鬆脆啲。然之後叫咗個秘汁雞翼，我以為佢係普通嘅滷水雞翼，但係食落甜甜地應該係加咗可樂去煮，所以個味道都幾特別，係媽媽嘅味道。最重要嘅係佢啲雞肉仲係好嫩得來實淨唔會好似煲湯雞咁散晒。然之後仲叫咗個口水雞，佢個口水雞個汁應該係自己調教，香香辣辣好開胃，啲雞都煮到啱啱好，夠晒滑。