麻辣娘子 (形薈) (已結業)

上次試過麻辣娘子嘅酸菜魚，等我今次試吓娘子香辣鍋先，配菜方面我就揀咗滑肉片、包心菜、牛柏葉同埋金菇，滑肉片其實即係腩肉，腩肉唔會乾，而且肥瘦適中，推介！其餘三種配菜都好適合乾鍋，非常索汁，餐廳會用蠟燭一直熱住個鍋，保持溫度之餘，可以keep住香氣。見到隔離枱食緊迷你鮮奶饅頭，搞到我都想試吓，好耐都冇食過炸饅頭點煉奶喇，外皮炸到好脆卜卜，讚！小菜方面，我就揀咗川汁皮蛋同埋涼拌土豆絲，皮蛋係黃金糖心皮蛋，賣相好吸睛，我揀咗BB辣都唔會話好辣。而涼拌土豆絲雖然賣相簡單，但係非常爽口惹味，平時鍾意食土豆絲嘅朋友就唔好錯過啦！飲品方面，我同朋友分別就叫咗芝士奶蓋炭燒烏龍奶茶同埋芝士奶蓋黑糖珍珠炭燒烏龍茶，黑糖珍珠煲到好入味，份量適中，唔會未飲晒杯茶就已經冇晒珍珠，配合芝士奶蓋非常出色！呢間餐廳喺將軍澳都有分店，唔係住港島區嘅朋友，不妨去將軍澳區試吓呢間出色川菜啦！