星期六放假同呀媽搭叮叮去咗筲箕灣嗰邊行吓。雖則東大街食肆林立，但真心無幾多間係掂，一句講哂：回頭率極低👎🏻。最終我哋穿過街市，嚟到位於新樓盤地下商場嘅「麻辣娘子」食晏。
餐廳佔地面積大，裝修行古典中式風，並以「娘子」做主角，👺卡通版嘅戲曲名伶穿梭於店舖唔同位置，整體感覺幾得意。但如果呢度冷氣可以涼啲就更好☺️。
餐廳採用QR Code自助落單，不過同時亦提供實體餐牌。餐牌圖文並茂，並且寫上簡單介紹，好讓客人更了解菜式內容👍。午市客飯星期一至日都有賣，價錢仲好相宜添。
香鍋配菜主要分兩類：葷菜(肉)🥩以及素菜🥦，兩者各有多款選擇。葷菜定價較貴，每款$38至$68不等；素菜則劃一價每款$25。我哋嗌咗魷魚鬚($48)、滑雞片($38)、萵筍($25)以及豆皮($25)，呢幾樣配菜都同個鍋底好夾。💚萵筍片爽脆嫩綠，豆皮帶好長好多，兩樣均係索汁一流嘅食材。
🦑魷魚鬚即係酒樓拎去炸嗰啲，有大條、有細條，細條質感淋啲，比較易咬。
🐔滑雞片有好多嚿，而且全部都好大嚿。另外，佢仲符合商品說明條例，肉質真係滑㗎喎。
總括嚟講，呢間四川料理店幾好🥢，我認為味道應該係有遷就過香港人嘅口味，即係無地道嗰啲咁重口味、咁濃烈。不過咁樣正正吸引多咗人去食川菜。服務方面，店員們嘅態度專業有禮，保持笑容，抵讚。最後，我上載埋餐廳嘅完整餐牌以供參考🙏🏻。
叫咗個回鍋肉，回鍋肉入口麻辣香都有，上枱賣相吸引，旁邊嘅配菜，青蔥，唐芹，辣椒，特別係椰菜都超級入味，鑊氣好夠。
跟住嘅麻婆，基本功做得好，豆腐柔軟，又嫩又滑，肉碎辣椒特別香口，花椒味非常特出，入口唔會係死辣，汗喺頭頂慢慢滲出，辣味溫和，但又未至於成個口都會麻痹，食唔到鮮味，所以唔錯。
午餐Menu加十零蚊要左個拍青瓜，覺得唔錯，蒜味非常之辛辣。
跟餐加$8至$12可以點佢哋嘅台式飲品，個烏龍茶同埋黑糖珍珠奶茶，以$12來講黑糖風味都算唔錯，有茶香及奶味。
可惜此店lunch都要加一服務費。兩個人埋單$158都唔錯，下次有機會可以試吓佢嘅酸菜魚呀或者辣雞煲。
影片
