何洪記

營業中

休息中

係呀，我又去食雲吞麵，不過今次不是一個人，而是兩個人諗住食飽去開工。在希慎廣場10-13樓幾層有不同的食肆選擇，開工之前沒有太輕鬆的心情去享受一餐，反而食碗雲吞麵簡簡單單更輕鬆。何洪記這老字號，我由銅鑼灣街鋪吃到現在希慎靚靚商場樓上鋪，味道靠得住，當然是食飽去開工的首選。當我話「簡簡單單」食一餐，千祈不要相信我，我行得入何洪記，又點會只叫一碗雲吞麵呢😆 大雲吞麵一碗，肉丸粥一碗，白灼腰潤腸，蝦餃，鮮竹卷，油炸鬼！回想以前吃街鋪雲吞麵檔，不離主打的雲吞或水餃麵，加碟油菜已經是一餐。早年我幫襯的何洪記街鋪除了雲吞麵，已經有其他粉麵飯，我還吃牛肉的年代，經常去何洪記吃乾炒牛河，非常好味夠鑊氣。近年在商場上樓了，餐牌選擇也多了，還有我最喜歡的幾樣點心，與其說是「去吃雲吞麵」，其實更應該說是「去飲茶但有老字號雲吞麵吃」，成件事聽落精彩得多，但又不失傳統老字號的招牌，完全是我的口胃。