大榮華酒樓

營業中

休息中

山長水遠去到元朗，係拎盆菜前先去元朗大榮華飲餐茶先。是次係我第二次來食了，上次食過大包同皮蛋瘦肉粥非常好味，今次一定要食。等位等左十分鐘就有位了，不過覺得等位的位置冷氣有點不夠，有些辛苦添。分配的位子是兩人位兼冷氣位，冇人搭枱又夠涼。出去即煮攤位見有各式糕點、小食，款款吸引又夠香。番位途中，見到食神滔哥同人飲茶，這次是第二次了，上次第一次來又見到，真有緣!講番食物，叫了奶黃馬拉糕、粉果、鯪魚球、滑雞扎、切肉燒賣同芙蓉蛋飯。原本想食的大包賣哂，粥就只限十一點前先有供應，有些失望呢!芙蓉蛋飯預先來到，芙蓉蛋內有蝦，洋蔥等配料一齊炒成，微微焦的蛋好香，不過食落超及咸，幸好有飯中和下，否則很難食得完。奶黃馬拉糕中間有一層層奶兼黃，蒸得好軟熟好香，不過可能不是新鮮蒸好，只是微暖的。鯪魚球我覺得最好食的，有陣陣的果皮味，食落彈牙冇腥味。滑雞扎同平時食的一樣味，不過舊魚肚好大件，吸哂汁好好味。切肉燒賣的肉不是肥肉，而且肉是清楚可見一舊舊的，不是平時的樣子。至於粉果冇食到，不過賣相不錯。總結味道好味，用料亦是較好貨色，唯一失望就冇得食大包同粥，同埋發覺好多野食係下午兩點幾已經賣清，下次要早些去食!