大快活 (康怡廣場北座)

營業中

休息中

今晚又唔煮飯，見到免費報紙有 coupon, 可用$25食個手打墨魚滑湯米線及$26叫個吉列雞扒豬肉漢堡飯，咁就平平哋同老公去附近康怡廣場嘅大快活試吓。，去到時大約6:15 pm左右，因為時間尚早，所以店內客人不多。手打墨魚滑湯米線 --- 啲墨魚滑唔知係咪真係手打，不過都幾彈牙；而且仲有葱粒、生菜、腐竹及豆ト，清清地都幾健康。啲米線都唔錯，幾滑漏；個湯我飲完之後一啲都唔覺口渴，應該無落到師傅。老公就話淡咗啲，不過清淡啲先健康嘛！吉列雞扒豬肉漢堡飯 --- 呢個都幾有創意，好似人地啲鴛鴦飯咁，有两邊唔同嘅醬汁。塊吉列雞扒雖然未至於好鬆化，但啲邊位都有少少脆，配埋個日式咖喱汁一齊食都唔錯。至於塊豬肉漢堡就浸咗喺啲茄汁上面，我一向都唔鍾意蕃茄汁，不喜愛佢嘅酸味，但呢個蕃茄汁又調校得唔錯噃，少少酸酸甜甜咁，餸飯一流。 老公仲話啲飯好靚，一粒粒，唔會黏埋一齊添。以咁嘅價錢食呢一餐，都算好抵。