影片
更多
2007-09-04
31 瀏覽
尋日(3-9-2007 Mon)因應一個由日本過o黎開會o既老闆要求食魚翅同飽魚,於是連同呢邊日本老闆6:45pm o黎到呢o度食飯.開頭侍應們都忙,冇人招呼,一會兒後就發現我o地喇,佢o地一律以中文招呼,於是我話佢知佢o地係日本人,到當問我o地要咩飲,佢o地要啤酒,waitress A都係以中文話畀佢o地知有咩啤酒,呢邊o既老闆係聽得明廣東話,但另一個唔識o架嘛,講o左佢知佢o地係日本人都重要講中文o既?唉!最後老闆決定o左要生力,我就飲熱茶.老闆決定叫三個每位$688.00名為’鮑翅吉品餐’,包括有:1.招牌大鮑翅先上一碟芽菜同小量唔太靚o既金華火腿絲,我都係第一次o係專食翅o既地方食o野,所以唔知係咁樣食,翅都o黎o左喇,冇醋伴上o既.我問waitress B係咪加入去食,佢答係,於是告訴老闆們.食落….唔覺有咩特別,只係啲翅唔係散開o左,係一排排,有一排半,感覺似好豪咁囉,湯汁比普通去飲宴o既杰啲.2.28頭吉品鮑魚鵝掌老闆問香港人係咪好鍾意食鵝掌,鳳爪咁,我答一啲啲啦,佢o地可能覺得核突,不過都試試,好彩鵝掌都炆得好淋,用刀一切都可以甩出o黎,唔會食得論論盡盡咁,佢o地都食得
開頭侍應們都忙,冇人招呼,一會兒後就發現我o地喇,佢o地一律以中文招呼,於是我話佢知佢o地係日本人,到當問我o地要咩飲,佢o地要啤酒,waitress A都係以中文話畀佢o地知有咩啤酒,呢邊o既老闆係聽得明廣東話,但另一個唔識o架嘛,講o左佢知佢o地係日本人都重要講中文o既?唉!最後老闆決定o左要生力,我就飲熱茶.
老闆決定叫三個每位$688.00名為’鮑翅吉品餐’,包括有:
1.招牌大鮑翅
先上一碟芽菜同小量唔太靚o既金華火腿絲,我都係第一次o係專食翅o既地方食o野,所以唔知係咁樣食,翅都o黎o左喇,冇醋伴上o既.我問waitress B係咪加入去食,佢答係,於是告訴老闆們.食落….唔覺有咩特別,只係啲翅唔係散開o左,係一排排,有一排半,感覺似好豪咁囉,湯汁比普通去飲宴o既杰啲.
2.28頭吉品鮑魚鵝掌
老闆問香港人係咪好鍾意食鵝掌,鳳爪咁,我答一啲啲啦,佢o地可能覺得核突,不過都試試,好彩鵝掌都炆得好淋,用刀一切都可以甩出o黎,唔會食得論論盡盡咁,佢o地都食得晒.而鮑魚….我覺得有啲腥.
3.杏汁撞蛋白
最後上o既甜品,可能waitress B見我o地樣樣餸都攤到凍晒至食,所以放低時都叫我o地趁熱食.打開蓋,一碗純白色o既甜品,冇咩香味,不過一食落口就好香杏仁味,而蛋白就係一舊舊咁,被杏仁味蓋過晒.
每個套餐重包括同自選小菜一款,價值大約$80.00-$110.00,如冇記錯,我o地不約而同地揀o既小菜都係$80.00,有:
4.五香南乳雞
嘩!炸到好乾身,冇汁伴上,細細件又細碟,食落有啲好鞋,有啲裡面又乾唔晒o既,而南乳味都幾濃,我自己覺得鹹o左小小.不過就唔係油淋池,重有張牛油紙墊底添..
5.花膠絲扖時蔬
時蔬係小棠菜,花膠絲竟然唔得,又係好腥呀!我老闆都唔食添啊.真係唔好意思.
6.XO醬肉碎西蘭花
呢個冇咩特別,唔太辣.
7.另外叫o左個楊州炒飯
Waitress B幫我o地分三碗上,我o個碗有好多蝦,飯炒得算OK,佢o地都食得好滿足.
服務:
1.溝通
佢o地知道要用英文溝通後,就調o左另一個後生少少o既waitress C o黎serve我o地,唔知係咪得佢一個識英文,但佢都唔係好流利o個隻,當上第一道菜時,佢問我o地要唔要飯(又係中文),於是我要翻譯,老闆問係咩飯,我同waitress直覺係一碗碗o既白飯就照同佢講,點知老闆話要一碟碟o既炒飯,於是又問佢有咩炒飯,佢又係用中文講o左好多種,呢啲老闆更加唔知係咩,亦都唔好旨意我翻譯,大家一頭霧水時,我就叫佢攞menu畀佢o地睇,點知佢話menu冇寫炒飯類,我真係呆o左一呆,點算?我話咁你同佢講啦,最後我老闆求祈話要ordinary炒飯,我估係楊州炒飯o掛,就咁決定啦.唉!!!講真,o係遊客區,都擺明要做遊客生意,點會一個大約30歲o既waitress(雖然應該唔係好高級,但應該係senior)都可以唔識講?
2.態度
waitress C應該係我o係o度接觸過態度最差o既,我見佢笑笑口應我老闆後,一轉頭未離開我o既視線時,佢已經即刻變臉,唔單止冇晒笑容,並且黑面.日本人出名有禮貌,何況我呢兩個老闆真係好nice,好冇所謂,而且我亦睇唔到老闆有咩o野特別麻煩o野.
除o左呢位略懂英文o既waitress C外,其他都冇咩問題.
環境:
冷氣稍為凍o左啲,唔知係咪人少關係.
呢o度都好闊落好舒服
其他:
正如上面提過,Menu唔係有齊所有食物,令遊客們唔識點餸 / 飯,要問至知,但問時,連侍應自己都唔識講,點算?
而枱上面有啲簡單寫上一兩樣甜品作為推介o既紙牌,都只得中文冇英文,佢o地要問我係咩o黎,對於我呢啲英文唔掂o既人就真係企o左o係o度.
最慘係有句:’能人所不能,我們堅持下去’,叫我點譯啊?而且我又唔覺佢o地有咩好o野係’能人所不能’喎. @.@”
老闆們大概飲o左6,7罐啤酒,埋單(今次我’目及’到喇)好似係$2,568.00,好貴.不過多謝老闆,老闆萬歲!
在此特別嗚謝尋日o係o度咁熱心幫我手諗邊間食肆o既食家們.我o地最後都冇去到你o地推介o既酒樓,真係過意唔去.
張貼