廚十三老壇酸菜魚 (太子集團中心) (已結業)

廚十三酸菜魚喺香港都開咗好多間分店，呢一排終於有機會試下佢；今次去咗尖沙咀分店，由於同行友人book位個陣要求坐窗口位，加上當日鋪頭唔算多客，所以都安排到坐窗口位，可以睇到維港景色，而且座位都寬敞，坐得都好舒服。老壇酸菜魚（小份 - 2人份）店員一拎盤酸菜魚上枱，個份量嚇親我，超級極度大盤，個盤仲大過我隻手，好彩我同友人都無加任何配料，同叫其他菜式，最尾先勉強食得曬成大碗酸菜魚。味道方面，我有啲失望，湯有啲油，飲落無咩魚味，反而飲落有好大陣薑味，一盤入面都有四至五塊薑，因為個人唔好薑味，所以麻麻地。一開頭以為配料會包埋少少寬粉，因為出面會包，但係點知呢間唔包，只係包咗幾塊蓮藕、幾舊豆腐、好多金菇、酸菜同魚，但係啲配料（蓮藕同豆腐）食落都無咩味，完全索唔到湯汁嘅味。酸菜魚整得好食其中一樣係魚要嫩滑，呢間嘅魚係幾嫩滑，但係食落有啲腥味，同埋有少少碎骨同魚鱗，都係可以接受嘅。價錢方面，個人覺得有啲唔抵，呢餐只係食酸菜魚，無食其他菜式，都要人均消費大概180蚊。