海都海鮮酒家 (已結業)

星期日晚，我和男友如常和爸媽&嫲嫲吃晚飯，今次選擇去海都，因為飯後要在會展聽智叔和陳敏兒分享他們的小兒子，諾諾的抗癌路。有成一年無嚟海都食晚飯，從前的海都走高級路線，是名人飯堂；現在已較大眾仍，走同胞路線，門口嗰隻機動超巨型大閘蟹真係娘到嚇死人。我哋尋晚點了五餸一湯，水準好一般：全晚最出色算係菜乾山斑魚湯，魚湯浸西洋菜亦有水準，西洋菜嫩口無渣，難得。家鄉煎肉餅又梅又爛，都幾難食！梅菜心蒸豆腐，味道中規中舉，賣反而令人留下印象。片皮雞是我家以前常點的菜式，做法較外間特別，用麵包伴炸子雞件吃。記憶中海都用的麵包非常香脆，和是晚的相差什遠。是晚的麵包質地像銀絲卷，咬落又粉又韌，仲有啲燶味！雞件亦不見得好，皮唔脆，肉唔滑，水準不復當年。炒老虎斑絲賣相靚，魚肉好滑，一啲魚腥味都無，不嗜魚的我和媽媽都滿意。相反地，嗜魚的爸爸和男友都唔欣賞，因為無皮又無骨，哈哈，這就是嗜魚之人和不嗜魚之人的分別。甜品要了芝麻糊，桑寄生和白糖糕。芝麻糊稀杰適中，芝麻味夠香，加上少甜，水準之作。桑寄生又稀又淡，不過勝在木耳和蓮子夠多。白糖糕一啲都唔酸，都算鬆軟。會唔會再嚟？趕睇會展show個晚咪會囉！