Ben哥廚房 (已結業)

名廚李錦聯喺深水埗西九龍中心美食廣場開咗檔Ben哥廚房，用晒自己做招牌，佢亦經常喺舖打躉，其實路經過好多次，不過開業咁耐都未試過，今日就即管試一次。佢有飯盒同埋有私房餸賣。我見佢鋪面有四個煲，印象中平時行過見到煲入面係有餸嘅，但今日係吉嘅，我以為賣晒，點知店員即係佢老婆就話全部都有。OK咁我哋就照落單啦，然後就見佢攞啲餸出嚟翻熱，感覺上已經覺得麻麻哋，早知係咁，我情願去返食三餸飯好過。首先揀咗個咖喱牛腩飯，飯盒都幾精緻，係將菜、餸同飯分開入盒，感覺衛生企理。咖喱完全唔辣，一啲都唔濃味，唔知佢屬於邊種咖喱，我仲食到有少少帶酸嘅味道。青瓜有四粒，唔似係醃製過，飯嘅份量唔算多，男士可能唔多夠食，牛腩份量可接受，另外仲有幾舊薯仔，我食到薯仔係帶點爽口，應該係炆得未夠時間。另外叫咗佢嘅秘製李錦雞飯，同樣係有青瓜四粒、白飯少許，雞嘅味道其實唔錯，雖然有少少偏鹹，但佢勝在雞胸嘅部位都可以做到肉質嫩滑，仲有啲雞汁浸住，呢個唔錯，可以一試！ $45一個飯盒，份量唔多，唔包飲品，以深水埗food court來講價錢算相對地高企，如果唔係掛住李錦聯呢個招牌，我諗佢好快已經捱唔住。