湄南 (已結業)

天晉匯呢邊好多餐廳都未試過，鐘意食越南菜嘅我哋揀咗湄南。兩點左右客人並唔多，餐廳佈置都幾雅緻，坐得幾舒服，室外都設有座位。我哋每人叫咗個午巿套餐，另加配一款小食，除咗越式蕃茄牛腩焗飯同呢度嘅菠蘿幾甜外，其他食物味道好一般，飲品選擇少，服務態度亦好一般。餐牌無列明可選擇嘅飲品，Order嘅時候職員只淡淡講句無，再問先冷淡講有咩選擇。越式海南雞飯(配中湯)，食越南菜必叫，雞有少少雪味，雞肉唔滑，油飯可以，最好就係個湯，味唔算太重，有少少椰子香味。越式海鮮炒金邊粉，海鮮少，除咗一隻蝦放面，其餘只有少量八爪魚，味比較淡，不過粉炒得乾爽少油，亦少油。越式蕃茄牛腩肉飯，我覺得個汁好好味，唔酸但有茄味，送飯一流，牛腩唔少，唔太淋有少少咬口。加配小食：鮮蝦菠蘿米紙卷(1件)，都幾大條，好多配菜，菠蘿好甜比較特出。越式春捲卷(2件)，新鮮炸起，好似有芋頭絲，都唔錯。香茅雞翼(2件)，好淡，無味，好似炸定翻炸咁。飲品選擇少。