深仔記

營業中

休息中

呢幾日都病都矒下矒下，又冇乜胃口。尋日晏晝唔係好想食嘢，就求其搵間魚蛋麵食。人人都話元朗多嘢食，但我附近要搵間有啲水準嘅粉麵都相當困難，因個麵要冇、或者係少鹼水味係一個好大難度。我係好憎鹼水味，有鹼水味就只能落醋去中和。由於鹼水能增耐麵嘅保存期限，因此越少鹼水就代表個麵越新鮮。估唔到咁好彩俾我食到呢間，個麵係一滴鹼水味都冇。魚蛋夠彈牙，雖然冇筲箕灣嗰間咁出色，但已經相當好。正宗size（即只係傳統大小、一定唔會飽嗰隻），對我嚟講剛剛好。不過就唔係完美，至少佢個湯底唔夠層次，雖然佢強調用金華火腿大地魚，我係少少都飲唔出，浪費。成間舖嘅客好少，喺嗰一區好輸蝕。或者佢定位配對唔到嗰區嘅客，就正如我食完後路過再早之前幫襯嘅粉麵店，勁多人，要比嘅話係我剛剛食完嗰間高班啲。可惜魚蛋麵始終係平民嘢，唔係俾得起錢嘅區都唔可以高尚得去邊。