金源小館 (已結業)

膠圓櫈肩踫肩只有半個人行到嘅通道，真係活現咗香港嘅土地問題。雖然環境不足，但依然門庭若市，優質細心服務應記一功。山東燒雞 真雞+素雞嘅組合真係估佢唔到，雞肉滑。個汁滿滿成碗蒜，再強調係成碗，令我聯想起首爾弘大個蒜蓉豬手，好蒜者必愛。蒸扇貝 size無得輸，嚿肉直徑8cam，連群邊，但可惜鮮味不足而且有啲overcook梅菜炒菜心 又係另一估佢唔到組合，好有生死戀或親子井feel，但菜心好老同無甜味，做唔到個咸與甜、老與嫰嘅對比。鎮江骨 肉排大大件，肥肉特有的彈牙肉質，鎮江醋醬汁香濃掛汁，醋嘅酸味剛好中和肉嘅肥膩感，送到幾碗飯，必點推介。小炒王 成日去酒樓點小炒王都瀬嘢，遇到啲蝦乾又硬又咸又乾嘅機會率好高。呢度蝦乾有切細，SIZE同其他材料相約，融合其中。腰果花生保持香口卜卜脆，無因為炒完而淋哂。飯後送糖水，下次想試佢有成頁紙嘅甜品。除咗以上菜式外，仲叫左兩條炸魚、蝦子豆腐、翠肉瓜、咕嚕肉，請埋生日主角每人才160, 抵食！