美食軒點心皇

營業中

休息中

荃灣要食一盅兩件，好多選擇，想懷舊，上山有，屋邨有，其他區嘅過江龍都有！但評價好似都麻麻，賣特色為主。依間我唔敢講歷史，真係搵唔到，但網評已可追朔十年，係附近打工仔間亦少有人氣。每日返工時間都有打工仔嚟買包、買飯，全部都外賣，相信唔係個個都無時間，而係入面過幾將枱一早已坐滿，好似係固定班底，就算遲嚟都有熟客幫霸位。一早食飯多唔多？唔一定多，但我識人買定做午餐，一來中午唔洗出嚟迫，二來早市盅頭飯平午市六蚊，肉比出面都多，返叮都抵過買叮叮。叉燒包一籠三隻，正常大細，叉燒口感同調味無特別，重點在於個包鬆軟，又實用，無粉味，甜味出哂嚟！其他點心都標準大小，最欣賞燒賣，絞得天然起膠，又帶點蝦肉粒，無加到粉，口感天然彈牙，本身對好多化學物過敏，而冰鮮蝦經常用化學物增加口感，做到所謂玻璃蝦嘅感覺，一般餐廳係冲洗同煮嘅過程已大幅稀釋，但做點心通常都無，直接加工，直接蒸，食完依類食物我都會感不適，但依間嘅出品，唔單止無事，試過有次凍咗食，味道竟然完全無影響！蝦餃皮薄，內有幾隻完整蝦肉，夾起無事，包裝時個盒太滿有隻壓破皮，餡仍完整無散開；粉果皮通常好粘，但依間唔粘之餘亦無油臭味，口感足，各方面都控制得好。