大公雞 (已結業)

又到週未模型時間，所以一早同朋友出左去工作室開工砌模型及上油。去到LUNCH時間就近近地過隔離KCC開餐，早排都係食漢堡包多，今日轉口味食台灣野。呢度坐位都闊落，所以揀左窗口位曬下太陽補充維他命Ｄ。套餐都多選擇，加少少錢就有個小食及飲品，唔錯。台式半根半腩飯，牛腩唔係講笑咁大件仲要打孖上！入口好腍同入味，但唔似港式咁咁重八角味，淡口一啲配飯唔錯。牛筋就煮到膠質出晒黎極黏口，啱晒對得冷氣多嘅我。不得不讚下個腌蘿蔔，夠脆爽酸甜，可以降低返下牛腩嘅飽滯感。招牌牛肉麵。牛肉同樣好大件同入味，麵底用左較厚身嘅關廟麵所以浸耐啲都唔會發脹。湯底濃厚，但不油膩味道同台灣食過嘅有八成相似。跟餐點左鹽酥雞及皮蛋豆腐，鹽酥雞炸得乾身脆口，食落咸香惹味，幾唔錯。而皮蛋豆腐就無咩特別，算係清一清味覺都可以。奶蓋烏龍綠茶。奶蓋都做得幾杰身，唔會咁快融化入去烏龍入面。但覺得茶底本身偏甜左啲可以等啲冰再融下先飲會更好。以新開店鋪黎講算係咁，最懷舊係用上公雞碗幾有特色。