你妳 (已結業)

之前都買過幾次小食及飲品，今晚唔想出街食飯，所以即刻諗到喺度買外賣，晚上特別多人，我前面最少有5～6個客， 佢哋係即叫即整，所以都等咗差唔多十五分鐘。佢哋個包裝盒設計唔錯，環保得嚟都幾保溫。 自選便當套餐$55， 有兩個主食，4個餸及4個小食選擇， 好容易揀到自己想食嘅配搭。今次食乾拌麵加三層五花控肉及香芋海鮮餅，五花肉好在唔會太肥，乾拌麵亦唔會因為外賣而發漲或變硬身，質素唔錯。 見到一個新增的超值套餐，計落真係幾抵，$65有齊主食、甜品及飲品。酥炸大雞扒蜜糖芥末吐司，甜甜地加芥末的微辣，味道有層次， 雞扒亦有台灣夜市水平。 三色仙草芋圓加小布丁感覺正宗，材料豐富，唔會太甜。 台式飲品都有水準， 高雄紅茶牛奶小芋及 金鑽鳳梨綠茶各有特色。