居食屋「和民」 (已結業)

因為之前十一月來和民有coupon送，趁住今日黎葵芳影聖誕裝飾，就順便黎用咗佢啦。我地未夠七點黎到，門口已經好多人等緊位，結果足足等咗半個鐘先有位，相當誇張。兩個人叫咗一份餃子，一個鍋及一個薄餅，份量剛剛好。和民自慢鐵板餃子 :一份餃子有八隻，餃子皮煎得香脆，豬肉餡肉汁豐富，店員上菜會提供麻油及辣油，但個人覺得唔駛沾都已經好好味。風味相撲雞肉鍋 :我地兩個人叫咗個大的，但由於配飯或烏冬要另外加錢，所以感覺份量都唔係好多。上菜時鍋仍然係凍的，再係檯面用個爐慢慢煲滾，鍋除咗雞肉外，亦有鯪魚肉，豆腐，紅蘿蔔，菇等等配料，湯底係柚子胡椒湯，清得黎帶有輕微辣味，所有食物煮淋後吸收晒湯底，感覺好暖和。和風比薩 :配料有叉燒及照燒雞，再加入照燒汁去烤，入口香脆，但上菜時係全塊上，要客人自己切開，有d唔方便，如果日後餐廳可以切埋先上菜就更好了。